نایافت کا سفرنامہ از ڈاکٹر ریاض مجید

نایافت کا سفرنامہ

ہم تجسس کے تپتے بیاباں کے جُھلسے پرندے
عجب ان گنت موسموں میں آڑے
ماسوا کے تعاقب میں نکلے، پہ ہر بار خالی نگاہیں لیے مرجعِ ہست کی سَمت ناکام لوٹے
گدلے پانی کی گہرائی میں جانے کیا کچھ ہے، کیا کچھ نہیں
کون کس طرح جانے؟
مدتوں ہم رہے ہیں خلاؤں میں گرمِ سفر
پَر اُچٹتی نگاہوں کی ڈھیلی گرفت آج بھی ہست کے ابرپاروں کے پیچھے کی ہر چیز سے بے خبر ہے
(سچ تو یہ ہے کہ آنکھوں سے نایافت کی کھوج بھی اک خسارے کی سوداگری ہے!)

نہ جانے وہ کیا چیز تھی
جس کی خاطر زمینِ بدن سے نکلنے کا الزام بھی اپنے سر پر لیا؟
پہاڑوں کے اُس پار __ دریاؤں کی اوٹ میں کس جگہ پر وہ کیا تھا
کہاں پر تھی وہ سرزمیں جس کی مٹی میں میرے لیے معجزے تھے؟
جہاں کے سبھی مرد اچھے، سبھی عورتیں نیک تھیں
کہاں ہے وہ بستی؟ کہاں پر تھا کیا؟
جس کی خاطر شب و روز تنہائیوں کے اجنتا میں خوں رنگ خاکے بناتے رہے
سوچتے تھے
کبھی سالہا سال کی اس ریاضت کا پھل گر اکٹھا ملا تو
سمجھ لیں گے جینے کی محنت ٹھکانے لگی!

اے ازل سے پریشاں ہوا،
شہرِ نایافت کے راستوں کی اکیلی مسافر!
ہمارا الم سُن!
کہ ہم ہر گھڑی مسخ ہوتی شباہت لیے خود کو یوں دیکھتے ہیں
کہ جیسے کوئی بُھولی بِسری ہوئی روح صدیوں کے بعد اپنے ویران گھر کی طرف لوٹ کر آئی ہو
اور فراموش دہلیز پر جا چکے موسموں کی اُگی، بے رُکی
پھیلتی گھاس میں دب چکے اپنے پیاروں کے نقشِ قدم ڈھونڈتی ہو

نظر کی پہنچ میں نہ آتے ستاروں سے پُھوٹی ہوئی روشنی
کیا خبر کس قدر نُوری سالوں میں جاں کے اندھیروں تک آئے!
محاذِ تجسّس سے پسپائی پر جو نگاہوں نے دیکھا
کسے علم وہ کتنی صدیوں میں تحریر سے آشنا ہو؟
عادتاً ہم سخن زار خالی ورق پر جُھکے ہیں!
لکھیں کیا؟ کہیں کیا؟
تجسّس کے عالم میں دیکھا ہوا ہر پراسرار منظر،
گھنے برگدوں کی زمیں چُومتی بوڑھی شاخوں سے چھنتی ہوئی
واہمہ روشنی ہے

(ڈاکٹر ریاض مجید)

Comments

Post a Comment

Popular posts from this blog

میں ‏نے ‏اکثر ‏یہ ‏سوچا ‏یے ‏از ‏یوسف ‏خالد

میں نے اکثر یہ سوچا ہے چاہت کیا ہے کتنا چاہا جا سکتا ہے کیسے اک احساس کو ماپا جا سکتا ہے چاہت کے اعماق میں پنہاں بےچہرہ احساس کی کوئی کھوج لگائی جا سکتی ہے کیا کوئی معیار مقرر ہو سکتا ہے؟ اک آواز نے میری سوچ پہ دستک دے کر مجھے سے پوچھا کیا یہ سانسیں جن کی بابت زندہ ہو تم کیا یہ سانسیں گن سکتے ہو؟ کیا آنکھوں میں پلنے والے سارے دکھ پہچانتے ہو؟ کیا آنکھوں کے اندر جا کر آنکھ سے باہر آنے والے اشکوں کی تصویریں ڈھونڈ کے لا سکتے ہو؟ کیا تم ایسا کر سکتے ہو؟ کیا تم کو معلوم ہے آنکھیں خواب کہاں سے لے آتی ہیں؟ کیا تم سارے خواب سنبھال کے رکھ سکتے ہو؟ کیا تم رات کی رانی کی خوشبو کا پیچھا کر سکتے ہو؟ کیا تم ہاتھ نہ آنے والے سارے رنگوں ساری خوشبوؤں سے اپنا ناطہ توڑ کے پھر بھی زندہ رہ سکتے ہو؟ کیا تم جو بھی کرنا چاہو کر سکتے ہو؟ جب تم کچھ بھی کر نہیں سکتے پھر بےکار سی سوچیں لے کر کیوں بیٹھے ہو؟ پیار کرو!! (یوسف خالد)
Read more

اداسی ‏ترک ‏کر ‏دو ‏اب ‏از ‏منان ‏قدیر ‏منان

اداسی ترک کر دو اب اداسی ترک کر دو اب یونہی بےکار مت بیٹھو کسی کے ہجر میں جاناں نہ خود کو اتنا تڑپاؤ اداسی ایک شعلہ ہے گھروں کو جو جلاتا ہے یہ دل بھی اک گھروندا ہے اگر جل جائے تو باقی نہیں رہتا ہے پھر کچھ بھی مری مانو وہ سارے خط جو اس نے تم کو لکھے تھے جلا ڈالو تمہیں جس نے بھلا ڈالا اسے تم بھی بھلا ڈالو!! (منان قدیر منان)
Read more

ردیف، ‏قافیہ، ‏بندش، ‏خیال، ‏لفظ ‏گری ‏از ‏شہزاد ‏قیس

رَدیف ، قافیہ ، بندِش ، خیال ، لفظ گری وُہ حُور ، زینہ اُترتے ہُوئے سکھانے لگی کتاب ، باب ، غزل ، شعر ، بیت ، لفظ ، حُروف خفیف رَقص سے دِل پر اُبھارے مست پری کلام ، عَرُوض ، تغزل ، خیال ، ذوق ، جمال بدن کے جام نے اَلفاظ کی صراحی بھری سلیس ، شستہ ، مُرصع ، نفیس ، نرم ، رَواں دَبا کے دانتوں میں آنچل ، غزل اُٹھائی گئی قصیدہ ، شعر ، مسدس ، رُباعی ، نظم ، غزل مہکتے ہونٹوں کی تفسیر ہے بھلی سے بھلی مجاز ، قید ، معمہ ، شبیہ ، اِستقبال کسی سے آنکھ ملانے میں اَدبیات پڑھی قرینہ ، سَرقہ ، اِشارہ ، کِنایہ ، رَمز ، سوال حیا سے جھکتی نگاہوں میں جھانکتے تھے سبھی بیان ، علمِ معانی ، فصاحت ، علمِ بلاغ بیان کر نہیں سکتے کسی کی ایک ہنسی قیاس ، قید ، تناسب ، شبیہ ، سَجع ، نظیر کلی کو چوما تو جیسے کلی ، کلی سے ملی ترنم ، عرض ، مکرر ، سنائیے ، اِرشاد کسی نے ’’سنیے‘‘ کہا ، بزم جھوم جھوم گئی حُضُور ، قبلہ ، جناب ، آپ ، دیکھیے ، صاحب کسی کی شان میں گویا لغت بنائی گئی حریر ، اَطلس و کمخواب ، پنکھڑی ، ریشم کسی کے پھول سے تلووں سے شاہ مات سبھی گلاب ، عنبر و ریحان ، موتیا ، لوبان کسی کی زُلفِ معطر میں سب کی خوشبو م...
Read more